De xunetu a avientu va haber 46 actuaciones de 31 artistes, grupos y promotores en 45 conceyos

28/06/2024.- El conciertu de Felpeyu en Somiedu abre esti 1 de xunetu la programación del circuitu de música d’Asturies, Cultura en Rede pal segundu semestre del añu. El grupu, una de les grandes referencies musicales de la rexón, va percorrer los sos cantares y temes instrumentales más conocíos, con un repertoriu que va tener como exa’l so últimu discu, Cerquina, a les 21:00 hores nel Anfiteatru de La Pola Somiedo.

En xunetu’l públicu tamién va poder disfrutar de la música de Skama la Rede en Bimenes el día 6; de la banda Latira en Nava, el día 12; de Los Indianos en Caravia, el 14; de Fontoria en Colunga, el 18; d’Un concierto de película del Dúo Amati en Sotu’l Barcu, el 19; de Llan de Cubel en Carreño, la nueche del 19 al 20; de Música de Sofá en Sariegu, el 21; del conciertu presentación de Querida Margot en Ribeseya, el 25; de Mina Longo cola so banda de mariachis en Cangues d’Onís, el 25; y de Fesoria a les Ortigues en Cabrales, el día 26.

Pal periodu de xunetu a avientu nel marcu del circuitu de música programáronse 46 actuaciones de 31 artistes, grupos y promotores en 45 conceyos. La programación actualizada pue consultase n’asturiesculturaenrede.es.

Los circuitos d’Asturies, Cultura en Rede son un proyectu de la Conseyería de Cultura, Política Llingüística y Deporte, lleváu a cabu en collaboración colos conceyos asturianos y xestionáu pola Sociedá Pública de Xestión y Promoción Turística y Cultural del Principáu d’Asturies.